وأنت في عز نومك وسعابيلك تسورب على المخدة وتشوف الورود المنقوشه تحاول تبعد عن سعابيلك وهي متقرفه الين تتراص في زاوية المخدة .. وأنت معطيها احلام بدون ما تحس بمعاناة المخدة اللي قلبت لون أصفر من شعرك .. تحلم على حسب رغبتك وحاجتك في الحياة أما فلوس وإلا منصب تعيشه للحظات بدال ما تصحى وترجع للمطبخ وتنظف البيالات والمدير يدق الجرس يقول جب شاهي وقهوة .. فجأة تصحا على صوت خالي من الإتكيت صرخة أبوك يفززك من عز نومك عشان الدوام والا المدرسة .. صرخة تغرف عقلك وتخلي سعابيلك ترفع ثيابها وتنحاش لأقرب تصريف للغرفة .. ( متى نتعلم فن التعامل مع النايم ) ..

نكد ( 2 )

يوم تحط خطه أنك تجلس في البيت عشان تسوي صلح بينك وبين زمزمية الشاهي وتروق وأنت توك مجمع شفايفك هالمتشققه كنها مواطي شبشب تقربها تبي تاخذ رشفه من البيالة تخش عليك أمك وهي لابسه بشتها اللي كله مليان تراب ووطيات من كثر ا لمشاوير وتقولك قم ودنا السوق وبنمر اختك على دربنا رجلها طالع للبر مدري سهران مع أخوياه بنجيبها معنا … تقولها يمه أنا كومار والا ولدكم وش هالأخوات اللي مشغلينا لموزين تحت الطلب وين رجالهم .. وتقوم عشان اختك وأنت مالك خلق لان الخطه خربت وضلت العلاقة متوتره بينك وبين الزمزمية لانك ما جلست معها ( ملحوظة ترى الزمزمية يعني البراد ) .. نكد من جد

نكد ( 3 )

تتزينين وتتمكيجين وتستعدين للطلعه ومتحمسه وفجأة تلقين أمك وأبوك تهاوشوا واختلفوا وأمك حلفت أنها ما تطلع وقفلت على نفسها الغرفه ولقيتي اخوانك كل وجيهم تحت الباب يصيحيون يمه أفتحي خلينا نروح ووأحد من أخوانك منسدح على ظهره يرجف في الباب ويصيح قسم بالله لو راح أبوي وخلانا أني لاوريك ( ولد عاق ) يطلع جو البيت قمة الكآبه والنكد ..

نكد ( 4 )

قمة النكد لما تشترين بلوزه وتخططين عليها بتلبسينها في هالمناسبه وأنت طالعه متروشه من دورة المياه وتغنين ( اكيد من دورة المياه مهوب من المجلى ) تكتشفين أن أختك لابستها وتتمخطر عند المرايه .. وتتهاوشين معها هذي حقتي وهي تقولك انت عندك تنانير كثيره وأنا ما عندي الا تنوره وحده وهالبلوزه اللي تناسبها .. تجي أمك تفك بينكم وتحلف لو ما هديتوا أن تكنسل الرحلة توافقين وأنت متنكده وعارفه أن اختك عومه ..

نكد (5)

تطلعين للسوق وتفرين فيه وتشوفين فستان اعجبك وبكل فرحه تسألين البايع فيه مقاس اكبر من هذا .. وهو يقولك لا مافيه يضيق صدرك وتروحين تلفين المحلات ادورين شي زين وهالفستان في بالك وترجعين له وأنت تقولين خلاص ابشتريه وفي نفسك تهمسين ابسوي رجيم لأن وزني زايد وتغثين أخوانك وأبوك وانت جاي جب معك خبز بر والا جبن قريش وهم فارشين السماط وياكلون من كل الانواع وأنت بهالجبنة كنك مسجونة وكل يوم قبل النوم توزنين وتكتشفين أنك ما نزلتي شي هنا يكون قمة النكد ..

نكد ( 6 )

اليوم تقص شريط افتتاح الملحق بأثاثه وروعته وتمدد رجليك بشطوبها كنها رجلين فلاح .. والناس داخله طالعه عندك وجوالك ما يسكت من هالعالم اللي بتجي عندك وبتطيح عندك وتزيد نسبة الزيارات مع تكثيف دوري كرة القدم .. وأنت تبي تطلع وتروح وتجي بس ما تقدر من هالعالم لدرجة أنك تطلب واحد من أخوياك يعطيك صور للشارع وللمناظر وآخر التطورات العمرانية في الرياض بسبة أنك ما تقدر تطلع .. ويزيد عدد النشبات وودك ترسل رساله لكل أخوياك أنك تطوعت بس تخاف يمرون ويشوفون سلك الدش ويقولون نصاب .. هنا قمة النكد

نكد ( 7 )

إذا طلعت تتعشى مع اثنين من أخوياك ويطلبون على كيفهم وفي آخر العشاء يجي وقت الحساب تشوف الأعذار اللي ابروح أغسل ويطول في المغسلة لدرجة أنك تحس ان جاي على يديه شحوم مكينه مهوب زفر من كثر ةالغسل .. والثاني يسوي يلمس مخابيه ثمن يناظرك ويطير عيونه ويقولك نسيت بوكي الله ياخذ العدو .. هنا بتقوم تحاسب وأنت في قمة النكد وتشطب من بالك بعض المشتريات اللي نفسك فيها وراسم تشتريها

نكد ( 8 )

بعض البنات وجيهم وسيعه مشاء الله اوسع من الدوار نفسه .. تغثك بالاستعاره من مكياج ومن عطورات ومن ملابس وخصوصا الفساتين لدرجة أنك تاكلين زياده عشان تسمنين وتخلين وزنك اكبر من وزنها عشان ما تطلب منك شي بعد اليوم .. ومع ذلك تجي تقولك ممكن تعطيني فستانك لأن بنت خالتي نفس جسمك بعد ما سمنتي شوي .. ( والله نشبه ودك تعزمينها وتصفقينها بغرشة ببس ابو نص عشان تضمنين الدكتور يحولها على مشغل باكستاني من قوة الفلقه ويحط العامل راسها تحت مكينة الخياطة ويخيط ..

نكد ( 9 )

أن كنت موظفه وتطلعين الصبح مع زوجك وهو نصه نايم ويلعن في المدرسة وأن رجعتي تعبانه وتقولين له أبرتاح ويطلق صرخة من قوتها يتحرك شنبه يمين ويسار كنه ميزان أبو كفه .. كل شي إلا الغداء ما أتنازل عنه أبد .. وأنت يا ضعيفه تقومين تسوين له الغداء وكلك نوم وتعب ما يصحيك الا بخار القدر إذا فتحتي الغطاء يجي في وجهك وآخر الشهر تتفكك عصبية زوجك وتطلع نواجذ اسنانه الصفر يجيك ويقولك قسط السيارة نازل وتسددينه له … وفوق هذا تدفعين ملابسك وملابس عيالك ومكياجك .. وتكتشفين أن زوجك مجرد محرم لك فقط هنا قمة النكد ..

نكد ( 10 )

تستلمين عمل التدريس مبسوطه ومروقه وكل يوم تمكسين خط وتنامين على كتف معلمه راهيه ( رويانه ) لكن تجري الرياح بما لا تشتهي السفن تطيحين في يد مديره عومه كنها اسطوانة غاز ومخها عباره عن لطخة مايونيز معفن تسلمك حصص الانتظار والإشراف والجلسه آخر الدوام وتنشبين في طالبه أبوها خطر يخليها تنام في المدرسة وينساها .. وأن جيتي تستأذنين توقف لك وتغثك بتعاميم الوزارة لدرجة أنك تكرهين العمل وتصير هالوظيفه بالنسبة لك قمة النكد ( مع احترامي للحريم ما ينفعون اداريات مافيه فكر ابداعي تطبق النظام بحذافيره لو كان النظام ينص على قتل الموظف ما عندها مرونه أبد ..

نكد ( 11 )

قمة النكد يوم تطلع مشخص ومرسم وصاك الغالوقه كن رقبتك مجبصه ومنعم بتروح تغازل وترقم بحكم أنك مسوي سنفره لوجهك وتبي تشوف مدى تأثير السنفره على البنات وجاذبيتك لهم وتكتشف أنها جذبت لك الهيئة وعفطوك وسندوك جنب الاستبنة حقت الجمس هنا قمة النكد وأنت توقع على التعهد والشيخ يلسبك بالسبحه والشيخ الثاني يشرب قهوة ويرمي عليك كلمات مالها سنع وتريقه ..

نكد ( 12 )

يوم تخشين محل وبتشترين لبس لك وينشب لك البايع أبو يمن بوجهه هالمحفر كنه ترنجه .. وإلا لبناني مثل الوردة << كاتبها وهو ضايق صدره .. يقولك : ياالبي هيدي مأسك يسلم هالطول وهالنظرة وهالجسم المتناسق خذي هذا مقاسك وأنت منحرجه ودك تقولين له خير يلعن شكلك وش عرفك في مقاسي وبعدين وش عندك تناظر يوم تقول هذا مقاسك .. وفي المحل قطعه معجبتك بس عناد فيه تطلعين وتخلينها .. هنا قمة النكد ودك فيها بس ما تبين تشترينها عشان هالبناني اللي مسوي ضريف والا هاليمني اللي يقز ويتصيد الفرص ويتكلم ..

نكد ( 13 )

تجي الاجازة وأنتم موعودين بسفره ومعلمين الناس كلهم ومبسوطين وفي آخر لحظه تتكنسل السفره وتخشين المسن وخوياتك يقولون لك وين السفره تقولين الوالد جاه شغل وأنت ما ودك تقولين عشان اخوي عزوز سقط .. هنا يطلع عزوز مفرق الجماعات وقاتل الاحلام .. ( والله من الحقد اللي بيجيك يا عزوز ) .. والبيت يطلع مناحة وصياح وأنت معد لك خلق شي وتنشبون في أبوكم يوديكم للشرقيه أقل شي عند البحر ويرفض وتكتشفون أن البحر حزين ويصبخ براسه في الشاطئ من الحزن هنا قمة النكد ..

نكد ( 14 )

تتعرفين على بنات كاش يسولفون عن مصممين فساتينهم أحمد البدوي اللي أقل فستان عنده بتسعة الآلف ريال وإلا زهير مراد وإلا إيلي صعب وإلا فالانتينو وإلا عن دار أمواج ومحلات فساتينها جاهزة ساكس فيث افينو ، وهارفي نيكلز .. وأنت يا حسرة فستانك من سوق الرياض الدولي ويلتفتون عليك يسألونك فستانك من وين ومستحية تقولين لهم من وين واتمتمين بينك وبين نفسك ياليت أني شايله التسعيرة اللي في الياقة قمة النكد لما تكون وحدة بثره تجلس تقلب الفستان وتحاول تشوف خامته وتلمس فيه وتبي تشوف الياقة وتطيح عينها على مقاس الفستان .. ويتكلمون عن إزالة الشعر بالليزر وأنت مازلتِ تطردين أخواتك من الغرفة عشان تشيلين سيقانك بحلاوة وبعد ما تخلصين تصير حمر من الشيل وتفركين الليمون عليها عشان تسد المسامات .. قمة النكد يوم تلعنين الفقر .. ( كل واحد يتعرف على اللي من مستواه عشان ما يتعب ولا يعيش في نكد

* * *

بالنسبة لي قمة النكد وأنا حاط اللاب توب على حظني تخلص البطارية واضطر اقوم أشبك الشاحن ، ودي أصفر ويجي الفيش عندي في السرير ( والله لو أن الفيش كلب عشان يجي على التصفيرة )

مهما طوقتنا لحظات النكد إلا ما يوجد بصيص نور منبثق يبعث الأمل في الحياة ويجلي الحزن بعيدا عن الصدور

النهـــاية