(( صح النوم ))

تلفون يرن بإلحاح شديد وجاء شخص توه صاحي من النوم ورد بصوت مبحوح كنه صوت عربية تبي تزييت وهو يقول :

الو ..

قال المتصل بأدب: السلام عليكم معك مكتب المواعيد في مستشفى ( ….. ) ومتصل عشان نبلغكم عن موعد أبوكم أنه تأجل

ضحك اللي راد وهو يقول :

يا الحبيب أي موعد ؟ الوالد متوفي له سنتين ..لأنه طفش من كثر ما تأجلونة وتعطونه مواعيد بعيدة مات وخلا موعده لشخص يحتضر غيره…عشان كذا لعد تدقون على هالرقم..( طوووط )  

(( ناس مهويه ))

واحد يقول لناس جالسين يا شباب فيه عائلة لهم ثلاثين سنه يبون ياخذون صورة جماعية وماقدروا ليش ؟ ناظروا فيه الشباب ونط واحد وجهه معفط كنه كتاب مستعمل وقال ليش ؟ رد هذاك بسرعة وهو يقول عشان دوامهم شفتات .. (( سكيرتية ))

(( مساعدة صديق ))

فيه واحد في برنامج مسابقات أتصل على خويه يبغى مساعدة ( ماحولك أحد ) وقال ألو ( حمد ) أنا في برنامج مسابقات وأبي منك تختار الجواب الصحيح .. والسؤال يقول .. أسرع أجراء تتخذه المستشفيات هو :

1-             مباشرة الإصابات الخطيرة وعلاجها (( امسك سرى الين تعفط رجليك ))

2-             أو تكثيف عدد الأطباء في مواسم الفيروسات كفصل الشتاء

3-             أو معاقبة الطبيب وتحويله للتحقيق في حالة خطأه أثناء تشخيص الحالة

قال الخيارات وسكت ورد عليه خويه وهو يتنهد ويقول والله أنا أشوف أسرع أجراء تتخذه المستشفى هو إجراءات أوراق الوفاة عشان يفضى السرير .

(( نهاية الزين ))

تنهد أبو سالم وهو يقول فيه عجوز تسوي عمليات تجميل الين جاها يوم ماعد قدرت تتحرك تدري ليش يا أبو محمد .. ناظره ابو محمد بكل برود وقال ليش ؟ رد عليه أبو سالم وهو متحمس لانها من كثر ما تسوي شد وصل فخذها عند رقبتها وتشصبت رجليها ألين صارت كنها ربيانه ناشبه بين حصاتين .

(( وجهة نظر مضروبة ))

كح ( سلمان ) وهو يقول بالله يا ( ابو عبد اللطيف ) قلة الأمطار في الرياض ما تذكرك بشي .. ضحك ( أبو عبد اللطيف ) وهو يقول الا والله تذكرني براتب بند الأجور  .