(( موعد مع الغباء ))

وقفت قدام المراية وجلست أضبط الياقة وأناظر في شعري هالموقف كنه شبك ممتلكات خاصه وأنا أقول في نفسي … ما صدقت على الله أقدر أقنعك يا (( شوشو )) عشان أقابلك اليوم وأخيرا راح أشوفك .. وأنا أتكلم رن جوالي وناظرت الرقم ثمن رديت وأنا قرفان .. هلا ( دردير ) وش أخبارك .. رد علي وهو يضحك هاه يا ( أبو هديب ) كيفك مع البنت اللي عرفتك عليها .. قلت بقرف تدري يا ( دردير ) أنا ذوقك ما أعترف فيه وخصوصا في العنصر النسائي .. أنت من النوع اللي لو أجيب مخدة وأرسم عليها عيون وأحط لها شعر حركت مشاعرك .. ضحك وهو يقول بالعكس أنا معروف عني اني صائد الجَمال .. سكّت شوي ثمن قلت .. الجمال والله أنا أقول حط كسرة تحت حرف الجيم بيلبق عليك أكثر … جاء بيتكلم قاطعته وقلت .. أقول( دردير ) أنا مواعد البنت اليوم بس خايف .. قالي ليش ؟ .. قلت مدري يا أخوي أحس أن صوتها كنه واحد يصك باب سطح … في صوتها بحة .. هي تشرب زيت فرامل ؟ ..

ضحك ضحكة عجوز عانس وهو يقولي خلك من صوتها وعلمني وين واعدتك فيه .. ترددت شوي ثمن قلت .. واعدتني في (( الحراج )) .. قالي وهو متشقق من الضحك ليش عاد في الحراج ناوية تبيعك مستعمل وإلا تبي تاخذ بك لفة عشان تختار أثاث عشكم إذا تزوجتو .. قلت وصبري نفذ يا ( دردير ) هي تقول أنها تحب القصص البوليسية وأنه أنسب وسيلة عشان محد يصيدنا ان حنا نختبئ في عرين الأسد ، يعني بالعامي نتقابل في مكان عام عشان محد يكشفنا ويعرف أن حنا على علاقة ببعض .. قاطعني ( دردير ) وهو يقول يا بختك متعرف على مباحث يعني اتوقع هالحين تروح تقابلها بتلقاها ماسكة جريدة ولابسة بالطوا .. قلت وين يا عمي فيلم مصري .. أنا من شفتك تاكل بصل حاف بدون طبخ وأنا غاسل يدي قاطعني وهو يقول أنت ما تدري أن البصل ينعم الصوت .. قلت والله شف لو صوت البقرة ينعم .. هذيك الساعة تعال قلي صوتك نعم .. وبعدين يا ( دردير ) من قوة ريحتك صنفتك حماية البيئة أنك من الأسباب الرئيسية في ثقب طبقة الأوزون .. جاء يتكلم قلت يا ( دردير ) تراني تأخرت عليها يا الله أشوفك على خير .. سكرت السماعة ..

ركبت السيارة .. ورحت للحراج وجلست ألف فيه أدور عباية سوداء .. وإلا ابي قلبي يدلني عليها .. بس مافيه فايدة .. قمت ودقيت على رقمها اللي كنه رقم عداد موية .. شوي سمعت صوتها وهي تقول وينك .. قلت أنا هالحين أدور في (( الحراج )) .. قالت أنا واقفة على الرصيف .. قلت أي رصيف .. سكتت شوي ثمن قالت واقفة وجنبي عمود مكتوب عليه ( قف ) .. تشوفني .. قلت أشوف العمود بس .. قالت أنا واقفة عنده .. قلت ما أشوف إلا كيس زباله .. قالت وش تقول انت .. هي قالت كذا على طول ركزت النظر شوي لقيت هالكيس يتحرك و له يدين ..عرفت إنها هي ..قلت شفتك يا قلبي هذاني جاي ..أنا راعي الفورد..قالت وهي مبسوطة حتى أنا شفتك … قلت لها بشري امك طيب.. وقفت عندها وركبت وأنا أناظر في عباتها المليانة تراب .. وأقول يا قلبي ليش عباتك كلها تراب لا يكون زالقة في الرصيف ؟ صدت بوجهها وهي تقول لا يا قلبي ..ثمن قلت طيب لا يكون صادمتك سيارة عند الإشارة ومن قوة الصدمة مسحتي بعباتك التراب اللي في الزفلت وبعدها قمتي ثاني مرة ؟ .. قالت وهي تضربني على كتفي وتضحك .الله يقطع سوالفك وش اللي تصدمني سيارة وأقوم ليش قطوة بسبعة أرواح ..سكتت شوي ثمن قالت تحرك عشان محد يشك فينا

تحركت وجلسنا ندور وحنا ندور بالسيارة .. قلت يا حياتي .. أبي اشوف وجهك ؟.. قالت مستعجل !.. قلت والشوق ذابحني الشمس يا قلبي ما يغطيها المنخل .. وأنت شمس .. قالت وهي تنزل راسها .. مشكلتي يا حياتي مقدر أرد لك طلب .. رفعت راسها ورفعت الغطوة معه أول ما رفعت الغطوة حسيت أن الزمن وقف وعيوني بلمت وجلست أناظر في وجهها وفي حركاتها وهي تتقصع يمين ويسار .. ثمن قالت وش رايك يا عمري .. قلت أي راي تبين رايي في خشمك هاللي كنه مساكن شعبية ، وإلا في حواجبك هاللي كنها سكة حديد ، وإلا رايي في براطمك اللي كنها فخوذ ناقة .. وإلا في وجهك هالدائري كنه قرص دش لو افره من جهة الشرق جاب لنا قناة المجد .. ضحكت وهي تضربني على كتفي وتقول يقطع شيطانك يا ( أبو هديب ) ما تخلي سوالفك .. طيرت عيوني وأنا أقولها أي سوالف أنا غُرر فيني ، المفروض أني اعرف انك شينة من يوم ما عطاني( دردير ) رقمك وقال أنك تشبهين أليسا قاطعتني وهي تقول والله أني احلى منها .. قلت من وين أحلى أنت وجهك يبغاله أريل تلفزيون عشان يطلع صافي ، شوفي الحبوب اللي في وجهك ناقصها مضراب ويطلع وجهك كيرم .. وأنا أتكلم قالت لو سمحت يا ( أبو هديب ) تراك جرحتني .. ضحكت ضحكة واحد جاه مس بالله أنت عندك أحساس عشان تنجرحين أنا أتوقع لو أفتح قلبك مانيب لاقي مشاعر أبلقى ألياف قصف سكر ما ذاقت المويه ابد .

لو سمحت يا ( أبو هديب ) حاول تدور في شوارع عامه عشان الشيطان شاطر .. قلت أي شيطان .. قالت الشيطان في النص بيني وبينك .. ابتسمت وقلت من جدك أنتِ .. الشيطان من يوم شاف وجهك تخبا وراي من الخوف .. وبعدين لي حساب عسير مع الشيطان اللي وهقني وخلاني أجي معك .. قاطعتني وهي تقول ما اجتمع رجل وامرأة إلا وكان الشيطان ثالثهم .. قلت بصوت عالي هذا إذا كنت مجتمع مع امرأة مهوب مع كرتون موز مرمي في براحة …وبعدين دامك عارفة أن الشيطان بيكون بيني وبينك ليش مناديتني .. قالت لاني أحبك وأبي أشوفك … ناظرت فيها وقلت حبك برص وأنا أتكلم جاء جنبي جمس وقام يحدني وأنا أحاول أني انحاش وهي تقول من هذولي .. قلت هذولي الهيئة رجال الحسبة اللي بيمسكوني هالحين ويلبسوني قضية .. والسبة موعد هالغباء اللي معك .
وقفني الجمس ونزل منة الشيخ والعسكري ومسكوني (( الكلام هنا مشفر عن كيفية المسكه واللي حصل فيها )) ركبوني ورى في الجمس وجلست على الاستبنة لان المكان كان مليان هنود وريحة صنان قاتله .. لكن أنا ما شميت شي لان كان خشمي مكسور من قوة الضرب والهنود يناظرون وجهي وتعفيطاته نط واحد من هالهنود وقام يصلي في الجمس قمت سألت اللي جنبي إيش في سوي هذا .. قال هذا هندي بوذي بس شكله اسلم يوم شاف الضرب اللي جاك .. وحنا نسولف أخذونا للقسم وخلوني أبصم وعطوني تعهد .. وأنا مرمي عندهم والندم ما كلني أكل ..

ناظرت في وجه الشيخ بعمق ثمن سألني وش تناظر .. قلت يا شيخ على أني غلطان وعلى إني في موقف بايخ وأكثر الشباب اللي في موقفي هالحين يحقدون على الهيئة ويشيلون عليهم بسبب الضرب اللي يجيهم ..إلا اني أحس بالفخر تجاهكم لأنكم تحافظون على النظام والأخلاق وتردعون أي فساد .. وتحمون الديرة من كل شخص يبغى يسيئ للدين وللناس لذلك الله يقويكم والله يعطيكم العافية .. ويحفظكم ..
قالي الشيخ باين عليك أنك ولد حلال (( وش عقبه بعد التشويت )) بس وش اللي خلاك تسوي كذا .. تنهدت وأنا أقول الشيطان اللي خلاني أسوي كذا وإلا أنا مالي في هالسوالف .. وقلت في نفسي خصوصا مع هالقرد اللي كانت معي .. على الأقل لو مع نانسي عجرم كان اتحمل مهوب الضرب اتحمل القتل اكثر من مره .
قالي الشيخ تعال وقع وأتوكل على الله ولا عاد تعودها .. وقعت وطلعت وأنا أقول التوبة ..