حنا من يوم الله خلق الكون وحنا عائلة مترابطة (( بدى الكذب )) والشي اللي يدل على ترابطنا أن حنا نجتمع على مأدبة الغداء كل أبو دايم ما يتخلف أحد حتى لو جاء واحد من البزارين وحط السماط نلتف حوله ننتظر الأكل ألين تجي أمي تقول وش مجلسكم كذا وبعدين من الكلب اللي جايب السماط وحاطه ما تدرون أن مافيه غيره ثمن تشيله ونرجع ندب في المنزل وكل حي يشوف طريقه وكأن مافيه شي صاير (( هذا دليل على الترابط الأسري )) …
 استمر الوضع كذا ألين جاء يوم ودخلت البيت ولقيت رسالة مدزوزة من تحت الباب مغلفه ومكتوب عليها سري ..
 
 ( الــورث )
 
 رحت أركض بدلع لأمي أعطيها الرسالة وهي تحرك القدر بالملاس قالت لي وش هذي قلت رسالة .. خبطتني بالملاس على وجهي وهي تقول ما قلت لك لا تاخذ من أحد شي .. ما عطتني فرصة أتكلم لان الملاس ينزل على وجهي مثل البرد اللي ينزل على الشينكوا
 
 تسطرت ألين لزق خدي في البلاط وصرت أشوف قاع الفرن وكان فيه جرذي تحت متكوم في زاويه تأثرا بالعنف وأمه تحاول تغطي عيونه وتقول لا تشوف وأنا أمك المناظر الدامية وهو يقول وين حقوق الانسان تضربه بالملاس لو بالنعله ما يخالف متعارف عليها .. لكن بالملاس شي ينفطر له قلب الحيوان كيف الانسان …
 
 قالت أمي بعصبية رح ناد أخوانك أبحط الغداء وبنفتح الرسالة على الغداء .. (( يقالها غداء عمل )) .. رحت أركض وأنا مثخن الجراح وخفوس الملاس على وجهي كنها خفوس مروش (( دش ))
 
 * * * *
 
 تجمعنا على السماط الذي لطالما بكى وتمسحت ألوانه من شدة الغسل لنواجه ذلك الصحن اليتيم على هذه السفرة البائسة .. جلسنا نناظر أمي وصحن الرز وبالتحديد الى الدجاجة اللي مفوحشه في الصحن .. جلسنا نناظرها بشهوة الين استحت الدجاجة وسحبت شرشف وتغطت (( محشش )) .. وأمي تقول أي واحد يمد يده قبل ما يسمي أقسم بالله لأمسح بوجهه بلاط المدرسة اللي اشتغل فيها ..أنا أربي بنات الناس على الأخلاق الحميدة وما أخليهم يرمون شي على الأرض وعيالي لازم يكونون مثلهم (( وظيفة الوالدة تفشل ما تنقال حتى لو كانت القصة خياليه )) ..
 
 سفهوها أخواني وسمو وأنا ناظرت في وجه أمي وعيونها محمره كنها ملخبطه في قطرتها وحاطه شطه في عينها بالغلط .. خزتني بعين ونزلت وجهي في الصحن اللي اخواني افترسوه وقلت لخوي السمين يا ( عبيد ) شوي شوي لا تاكل الوردة اللي في الصحن … قالي أنت ما تعرف أن الأكل على الكلام يقل المعرفة (( اكيد الرز مصلح بموية غسيل عشان كذا بدى يخور الولد في الحتسي )) توني ابمد يدي قالت أمي قيام .. كفينا كلنا وهي تعدل نظارتها الكبيرة اللي مخليه وجهها يجيه ترهل من ضخامتها قالت أخوكم ( ابو هديب ) جاب رسالة وما ندري وش مكتوب فيها .. وأنا مثل ما عودتكم أم ديمقراطيه أحب تشاركوني في كل شي حتى في فرشاة أسناني اللي أستخدمها (( فاهمه الديمقراطية غلط )) وهالحين نبي نشوف وش في الرسالة ..
 
 فتحت الرسالة بكل كبرياء وعظمه (( على طاري عظمة لها علاقة بياسر العظمة )) وقالت
 بصوت عالي :
 
 السلام عليكم ورحمة الله وبركاته :
 نحن السادة البنك نحيطكم علماً بأن لدينا رصيد متوقف عن الحركة دام أكثر من خمسة سنوات ونود حضوركم للمفاهمة حيث أن صاحب الرصيد قد وصل رصيدة إلى الخمسة عشر مليون ريال .. الرجاء الاتصال على هذا الرقم …..
 بعناية السيد / …………….. (( الحلم زين )) ..
 
 نطينا من الفرحة وكل واحد قام يناظر في اللي جنبه ويقول بنصير أغنياء وبنشتري سيارات والثاني يقول وبيوت والثالث يقول وفلل ( (هي نفسها بس من الفرحه قمنا نخور )) صرخت أمي صرخه من قوتها ضواطير البيت كلها توزت في جحورها وهي تقول .. انسوا الموضوع الورث هذا لي أنا .. أبوكم تركه لي أنا .. فجرت أمي قنبله موقوته في المكان وخوي ( عبيد ) بكل غباء الدنيا يناظر فيها وهو يحاول ما يصيح لكن بمجرد ما سكر عيونه على طول غاصت في خدوده وقدر يحتوي الموضوع ..
 
 * * * *
 
 تشتت أحلامنا الوردية (( يا شين اللي يكثر قراية قصص عبير )) .. صرنا نجي نحبب يدين أمي عشان تعطينا شوي من الورث لانها هي الوصيه علينا وأخوي ( عبيد ) كان يطلبها ترفع مصروف الفسحة شوي لان المقصف حقهم غلا السنتدوتشات يوم درى أن عندنا ورث (( حتى المقصف حاط عينه على الورث )) .. عصبت وقالت كل واحد على غرفته ما تدري أن حنا تسعه في غرفة وحدة كأن حنا في زنزانة حتى أخواتي ست في غرفة وحدة رحنا لكنا .. وأنا رحت أخذت الحصالة فتحتها لقيت خمسة ريال هريانة والصورة اللي عليها ناشفه براطمها من الضما وجلست أكلم الحصالة بكل حب وود خلاص يا حصالتي بتمتلين فلوس .. وأختي تناظر خشتها الشينه في المرايه وهي تمسك خصلة من شعرها كنه سبرنقات سرير .. وتقول اخيراً ابسوي فرد وميك أب وشدو وشد للبشرة وتشقير حواجب .. كانت تناظر في المراية وهي تحلم والمراية ما كانت اطلع وجهها كامل من صعوبة تركيبته .. كانت تتكلم والمراية ودها تقولها مافيه أمل تصيرين زينه بس خافت تجرح مشاعرها عشان كذا اكتفت المراية بتفله في وجهها (( نصاب )) ..
 
 وأخوي الثاني ( فارس ) يناظر جهاز الكيمبيوتر اللي تبرع به ولد جيرانا له يوم ابوه شراله لاب توب (( نستقبل فضلتكم عادي )) ويقول أخيرا ابشتري لاب توب وأقدر ادخل من أي مكان في البيت (( الله من كبر البيت كله غرفتين وصاله وحوش عشان الغساله )) أخيراً أبودع هالجهاز القديم اللي كنه طاحونة مكسرات .. جلس يحلم ..
 
 وناظرت في اخوي ( برجس ) << الاسم غير محبذ عند الفتيات .. جلس يناظر في السقف مدري وش يناظر بس الوكاد أنه يحلم وهو يقول أخيراً أبقدر أشتري شهادة البكلريوس (( الفاشل ما قال اباخذها بعرق جبيني )) وأقدر أتوظف في محل راقي بدال السباكة اللي ملعوزتني .. قلت في نفسي من زين شغلك شابك الماصورة حقت الموية في انبوبة الغاز يقالك بتخترع سخانه لنا في هذا الشتاء القارص (( اشوى ان الغاز انفجر فيه اكثر من مره ولا مات قطوه )) كنا في كل مره نصلح الجدران من فلوس الشؤون اللي ما تسمن ولا تغني من جوع ..
 
 التفت على أخوي ( هيثم ) الصغير وهو يناظر في التلفزيون الخشبي حقنا القديم والمذيع يقول أما الآن نقدم لكم العرض الأول من مسلسل ( ليلة هروب ).. ثمن بعد ربع ساعة قطعوا المسلسل وطلع المذيع وهو يقول ننتقل بكم الآن لنقل مباشر لحرب الخليج ( تلفزيون ما يجيب إلا أشياء قديمه وفنانين متوفين في عز شبابهم رغم أن حنا سنة الفين وسته كله عشان التلفزيون معفن وقديم لو شوش وطقيناه من فوق عشان يصفى كح الممثل من الغبار اللي يطلع منه )
 
 وحنا نحلم نادتنا أمي وتجمعنا كلنا في الصالة وقالت لنا أبتصل على البنك وأبيكم تسكتون … اتصلت على البنك وقالت للموظف عفوا انت فلان بن فلان قال أيه قالت وصلتنا رسالة منكم من تحت الباب قالها الموظف بكل برود هذا عشان ما عندكم صندوق بريد ولا عندكم جرس عشان ندق عليه وفوق هذا كله الباب هريان استحينا نضربه يطيح عليكم ونشوف اللي داخل (( ما راعى شعورنا ان حنا فقراء الحيوان جالس يتريق )) قالت أمي طيب وش القصة قالها أول شي عطيني أسم أبوكم كامل .. قالت أسم أبوي ثلاثي وقال الاوراق اللي عندي هنا مطابقة لأسم أبوكم بس يا ليت تعطيني أياه رباعي عشان اقدر اسجله في السستم .. قالت أسم أبوي رباعي ثمن سكتت شوي بعدها طيرت عيونها وهي ماسكه السماعة وأنا أقولها يمه وش فيه ليكون الموظف دخل اصبعه في أذنك طاحت السماعة من أمي وأخذتها أنا وأمي مبلمه قلت وش فيه يا الأخو عسى ما قلت طلاسم وسحرت أمي معد نطقت أبد .. قالي يا خوي حنا آسفين صار فيه خطأ وحنا أرسلنا الرساله للشخص الخطأ .. قلت طيب الأسم مثل ماهو .. قالي تشابه أسماء الثلاثية لكن في الرباعي يختلف .. حنا آسفين ..
 سكر السماعة وتلاشت مع تسكيرته أحلامنا وأولهم أنا أخذت حلمي وشققته ورميته مع الدريشة ( والله لو انه ورقه ) …
 
 وعشنا على حالنا في غياب الفقر وظلمات الحياة اللي مستحيل تنيرها الشمس بكبرها لو كانت فيها ..
 
 ما يستفاد
 
 1-أن الصدقة زينه واللي معه شي يرسله لي على الخاص (( وجهه قوي ))
 2-الفقر مهوب قلة أدب (( قصده مهوب عيب بس تعليمه على قده ))
 3-إذا كان عندك أم شخصيتها قوية حاول تشيل الحديد اللي في البيت والحاجات الثقيله عشان تصير شخصيتها ضعيفة (( نادي أثقال مهوب بيت )) << واضح أن مخه فاضي ..
 4- اللي عنده أخت شينه يحاول يبيعها على راعي مزرعه ذرة عشان يحطها فزاعه